من عام 1805ولغاية 18يونيو 1953 يوم إعلان الجمهورية المصرية
محمد على باشا : ( ولد فى كافالا ، مقدونيا ، 1769 من – توفى فى اسكندريه فى 2 اغسطس 1849 ) من أصول كردية عريقة هاجرت من ديار بكر الى مقدونيا بحكم وظيفة والده في ممثلا للباب العالي في مقدونيا , حكم مصر من 17 مايو 1805 ل 1 سبتمبر 1848. دفن بعد وفاته فى جامعه فى قلعة القاهره. بناء على معاهدة يوليه 1840، محمد على بقى نايب للسلطان العثمانلى على مصر ، و ان مصر تكون بحدودها القديمه وراثيه فى اسرته للإبن و الحفيد الأكبر سناً بس على اساس ان مصر تكون جزء من الدوله العثمانليه و يدفع ضريبه سنويه للباب العالى مع تحديد عدد الجيش ب 18 الف و ما يبنيش سفن حربيه. لما عييى محمد على سنة 1848 صدر فرمان من الباب العالى فى الأستانه بتعيين ابنه ابراهيم باشا والى على مصر.
- ابراهيم باشا : ( اتوفى فى نوفمبر 1848 ) حكم مصر سنة 1848 بعد ما اتعين والى على مصر عن طريق فرمان من الباب العالى فى الأستانه لما عييى أبوه محمد على باشا.ابراهيم باشا قاد الجيش المصرى فى قمع ثوار اليونان المتمردين على تركيا العثمانليه و غزا فلسطين و الشام و عدى جبال طوروس و وصل لغاية كوتاهيه (1832 – 1833 ) ،و انتصر فى المعركه الفاصله بين المصريين و الأتراك فى أتريب (1839)، لكن الدول الأوروبيه الزمته بالتراجع عن كل المناطق اللى استولى عليها.
- عباس حلمى الاول : (اتولد فى جده سنة 1813 – اتوفى فى بنها سنة 1854 ) حفيد محمد على باشا ، نشأ فى مصر و حكمها بعد وفاة عمه ابراهيم باشا من 10 نوفمبر 1848 لوفاته. عاش حياه فيها بذخ و أهمل شئون الدوله.
- محمد سعيد باشا : (اتوفى فى يناير 1864 ) ابن محمد على باشا ، حكم مصر لغاية وفاته.
- اسماعيل باشا : ابن ابراهيم باشا و حفيد محمد على باشا ، حكم من 19 يناير 1863. اتلقب بلقب ” خديوى ” سنة 1867 ، و حصر وراثة العرش فى ولاده بس. فى عهده افتتحت قناة السويس للملاحه العالميه لكن ديونه و و سياسته الماليه الوحشه ادت لعزله فى يونيه 1879 ، و اتنصب مكانه ابنه محمد توفيق خديوى على مصر. اتوفى فى الأستانه و اندفن فى مصر.
- الخديوى محمد توفيق : اتنصب خديوى على مصر فى 26 يوليه 1879 بعد عزل أبوه اسماعيل باشا. فى عهده اندلعت الثوره العرابيه بقيادة احمد عرابى و حصلت حادثة قصر النيل و واقعة ميدان عابدين (سبتمبر 1881) و انتهت باحتلال الانجليز لمصر سنة 1882.
- عباس حلمى التانى : ابن الخديوى محمد توفيق اتنصب خديوى فى 8 يناير 1892 و حكم مصر لغاية عزله فى 10 سبتمبر 1914.
- السلطان حسين كامل : الابن التانى لإسماعيل باشا. حكم من 1914 لغاية وفاته فى اكتوبر 1917. فى عهده خرجت مصر من سلطان تركيا و دخلت تحت الحمايه الانجليزيه. اتنازل ابنه الامير كمال الدين حسين عن حقوقه فى تولى السلطنه المصريه.
- فؤاد الاول : ابن اسماعيل باشا. اتنصب على عرش مصر فى 9 اكتوبر 1917. و فى مارس 1922 اتلقب بملك مصر. حكم لغاية ما اتوفى فى 28 ابريل 1936. فى عهده قامت ثورة 1919 بزعامة سعد زغلول ، و اتعملت فى مصر اول وزاره شعبيه برياسة سعد زغلول.
- فاروق الاول : اتولد فى 11 فبراير 1920 ، اتنصب ملك على مصر فى 28 ابريل 1936 بعد وفاة أبوه فؤاد الاول. اكمنه كان لسه قاصر حكم تحت وصاية مجلس بيضم الامير محمد على باشا و عزيز عزت باشا و شريف صبرى باشا ، لغاية ما اتسلم سلطاته الدستوريه الكامله فى 29 يوليه 1937. حكم لغاية ما اطاح بيه الانقلاب المعروف بثورة 23 يوليه 1952، و اجبر على التنازل عن عرش مصر لابنه الطفل احمد فؤاد التانى. راح على ايطاليا و اتوفى فيها فى 18 مارس 1965 ، و اتدفن فى مسجد الرفاعى فى القلعه فى القاهره.
- احمد فؤاد التانى : ابن فاروق الاول اللى اتعزل. قعد على عرش مصر فى 26 يوليه 1952 ، و اكمنه كان طفل صغير اتشكل مجلس وصايه عليه كان بيضم الامير محمد عبد المنعم و بهى الدين بركات باشا و القائم مقام رشاد مهنا ، لغاية اعلان الجمهوريه المصريه فى 18 يونيه 1953 ، و بيه انتهى حكم اسرة محمد على باشا.